-នាថ្ងៃអាទិត្យទី១៦ខែសីហាឆ្នាំ២០២៦ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អញ្ជើញជួបសំណេះសំណាលជាមួយមន្ត្រីកសិកម្មឃុំ-សង្កាត់ ខេត្តកំពង់ចាម និងខេត្តត្បូងឃ្មុំដើម្បីតម្រង់ទិសក្នុងការអនុវត្តការងារកសិកម្ម និងតួនាទីភារកិច្ចមន្ត្រីកសិកម្មមូលដ្ឋាន ឱ្យកាន់តែមានប្រសិទ្ធភាពបន្ថែមទៀត ជុំនួបនៅសាលាខេត្តកំពង់ចាម។
-កិច្ចប្រជុំអញ្ជេីញចូលរួមពីសំណាក់ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ ព្រមទាំង មន្ត្រីថ្នាក់ដឹកនាំក្រសួងកសិកម្ម មន្ត្រីថ្នាក់ដឹកនាំរដ្ឋបាលខេត្ត-ស្រុក និងមន្រ្តីជំនាញនៃរដ្ឋបាលខេត្ត-ស្រុកទាំងពីរផងដែរ។
-ឯកឧត្តមរដ្ឋមន្រ្តី ក្រសួងកសិកម្ម បញ្ជាក់អំពីគោលនយោបាយអាទិភាពទី៥ និងទី៦ របស់រាជរដ្ឋាភិបាលដេីម្បីឱ្យប្រជាពលរដ្ឋ “មានហូប មានប្រេី មានបាន និងមានរហូត” ដែលធានាបាននូវសន្តិសុខស្បៀង និងនិរន្តរភាពសេដ្ឋកិច្ច និងបរិស្ថាន ស្តែងចេញពីមន្ត្រីកសិកម្មខិតខំក្នុងការអនុវត្តតួនាទី និងភារកិច្ចជួយប្រជាកសិករ ពីមន្រ្តីកសិកម្មឃុំ-សង្កាត់សហការជាមួយអាជ្ញាធរមូលដ្ឋានផងដែរ។
-ឯកឧត្តមរដ្ឋមន្ត្រី ផ្តល់អនុសាសន៍ផ្តាំផ្ញេីឱ្យមន្ត្រីកសិកម្មឃុំផ្តោតសំខាន់លេីការណែនាំអំពីការដោះស្រាយបញ្ហាប្រឈមរបស់កសិករ ផ្តល់ជាជំនួយបច្ចេកទេស ជាពិសេសការចងក្រងសហគមន៍កសិកម្មទំនេីប ដេីម្បីទទួលបានផលចំណេញ និងលេីកកម្ពស់ជីវភាពប្រជាពលរដ្ឋនៅមូលដ្ឋាន សំដៅរួមចំណែកប្រែក្លាយកម្ពុជា ទៅជាប្រទេសចំណូលខ្ពស់នៅឆ្នាំ២០៥០ពិតប្រាកដ៕
