កាលពីថ្ងៃទី៩ខែកុម្ភៈឆ្នាំ២០២៦ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ជួបពិភាក្សាការងារជាមួយ ឯកឧត្តម Christian DesRoches ឯកអគ្គរដ្ឋទូតវិសាមញ្ញ និងពេញសមត្ថភាពនៃប្រទេសកាណាដា ប្រចាំព្រះរាជាណាចក្រកម្ពុជា កិច្ចពិភាក្សាផ្លាស់ប្តូរយោបល់អំពីការពង្រឹងកិច្ចសហប្រតិបត្តិការលើវិស័យព័ត៌មាន ជាពិសេសការបណ្តុះបណ្តាល និងការពង្រឹងសមត្ថភាពដល់អ្នកសារព័ត៌មាននៅប្រទេសកម្ពុជា។
-កិច្ចពិភាក្សាភាគីទាំងពីរលើកឡើងអំពីសារៈសំខាន់នៃការអភិវឌ្ឍធនធានមនុស្សក្នុងវិស័យសារព័ត៌មានឆ្លើយតបបរិបទឌីជីថល ការកើនឡើងនៃព័ត៌មានមិនពិត និងតម្រូវការអ្នកសារព័ត៌មានប្រកបដោយវិជ្ជាជីវៈ និងក្រមសីលធម៌ពិតប្រាកដ។
-ឯកឧត្តមនេត្រ ភក្ត្រា រដ្ឋមន្ត្រីក្រសួងព័ត៌មានបញ្ជាក់ថា ក្រសួងកំពុងផ្តោតលើការពង្រឹងសមត្ថភាពអ្នកសារព័ត៌មាន តាមរយៈកម្មវិធីបណ្តុះបណ្តាលបច្ចេកទេស ឌីជីថល ការផលិតមាតិកាដែលមានគុណភាព និងការពង្រឹងក្រមសីលធម៌វិជ្ជាជីវៈ។
-ឯកឧត្តម ឯកអគ្គរដ្ឋទូតកាណាដា ប្រចាំនៅកម្ពុជា សម្តែងការគាំទ្រ និងចំណាប់អារម្មណ៍ក្នុងការពង្រឹងកិច្ចសហការជាមួយក្រសួងព័ត៌មានកម្ពុជា តាមរយៈការចែករំលែកបទពិសោធន៍ អ្នកជំនាញ និងការគាំទ្រកម្មវិធីបណ្តុះបណ្តាល ដែលអាចជួយលើកកម្ពស់គុណភាពអ្នកសារព័ត៌មាន និងសមត្ថភាពវិជ្ជាជីវៈរបស់អ្នកសារព័ត៌មាននៅកម្ពុជា។
-ភាគីទាំងពីរឯកភាពពិភាក្សាលម្អិតលើគម្រោងសហការដើម្បីរួមចំណែកអភិវឌ្ឍវិស័យព័ត៌មាននៅកម្ពុជាឲ្យកាន់តែរីកចម្រើនបម្រើប្រយោជន៍សាធារណៈកាន់តែប្រសើរឡើងបន្ថែមទៀត៕
